Во интервју за неделникот “Данас” известувачот на Европскиот парламент за Македонија, Иво Вајгл, рекол дека не би сакал да ги коментира изјавите кои се однесуваат на случувањата во Куманово и дека тие треба одговорно да се проучат и да се даде заклучок во однос на тие прашања.
„Состојбата е доста сложена и односите на тамошните политички сили, нивните програми, нивните намери не се јасни, доколку човек ги поглед од далеку“, рекол Вајгл и додал дека за Македонија „се знае она што беше соопштено од извештајот на Европската комисија за напредокот и врз осносва на тие податоци во Европарламентот беше усвоена резолуцијата минатиот март, чија битна суштинска порака е поддршката за македонскиот пат во евроинтеграциите, особено кон ЕУ, но и НАТО.
„Познавајќи ги моменталните работи ние ја нагласивме и потребата од продуктивен и одговорен дијалог од најголемите политички партии, со цел политичката криза да се надмине. А нагласивме и дека сите обвинувања кои беа помеѓу претставниците на двете најголеми партии, една владејачка и една опозициска, треба да се проучат на објективен начин, на непристрасен начин и доколку се покаже дека тие обвинувања се засновани на факти, одговорните треба да сносат и последици“, изјавил Вајгл.
На прашањето дали смета дека случувањата во Куманово се инцидент или појава на која треба да и посвети повеќе внимание регионално, тој одговорил дека треба да им се посвети посебно внимание на таквите случувања.
„Меѓутоа, случувањата се уште не се расчистени и расветлени од сите страни. Се уште се јавуваат разни хипотези околу тоа зошто и како дојде до ова. Потребно да се изврши една темелна истрага, а на тоа обврзуваат и жртвите од тие настани“, рекол словенечкиот европарламентарец.
