За само неколку дена уште еден вандалски чин на несовесни граѓани на новата пешачка патека.
По дрвцата овој пат настрадаа поставените жардињери кои треба да ја разубават оваа патека и да и дадат модерен изглед. Несовесни граѓани го искршиле украсниот мермер со кој се поплочени жардињерите, а кој штотуку почна да се поставува. Овој чин утринава бил забележан и од вработени лица во ЈП „Охридски комуналец“ како и од оперативците кои ги изведуваат градежните работи на пешачката патека. Од локалната самоуправа изразуваат жалење за ваквиот чин. Велат дека е неразбирливо зошто некој би се осудил да уништува јавно добро што е од корист за сите граѓани.
„Се разбира тоа не е за локалната самоуправа и за поединци, туку уредувањето на тој простор е од корист на сите граѓани кои таму ќе рекреираат. Се се сведува на подигање на јавната свест за она што е јавно добро. Ние можеме и позорникар на секои десет метри да имаме таму или видео надзор што ќе се сложите во овие услови е малку потешко да се обезбеди, но еве ќе речиме ако имаме видео надзор и имаме таква појава и ќе биде забележан тој што е прекршител, но тоа ќе биде направено. Целиот приод кон оваа работа е на подигнување на јавната свест, да не се повторуваат вакви работи затоа што сето тоа е за општо добро за сите граѓани на Охрид.“-вели портпаролот на општина Охрид, Томе Џамтоски.
Како што е познато, новата модерна пешачка патека која ја гради локалната е во непосредна близина на седиштето на сообраќајната полиција. Стапивме во контакт со портпаролот на СВР-Охрид, Стефан Димоски, кој во телефонски разговор најпрво не информираше дека овие вандалски чинови не биле официјално пријавени во службата. Димоски додава дека она што е во нивни раце, ќе биде преземено како конструктивна помош да се заштити она што е јавно добро од ваквото деструктивно поведение. Потенцира дека случајот со искршените мермерни плочки и уништување на јавни добра ќе бидат земени во предвид во насока на обезбедување на нагласено внимание на овој дел од градот. Инаку минатиот викенд мета на сличен вандалски чин беа и новопосадените дрвца на оваа патека односно нејзниото хортикултурно уредување кое заедно со партерното уредување чини скоро 7 милиони денари.
