Празнична вечер на Охридска Банка. Еден од симболите на современиот Охрид е зградата на централата на Охридска Банка. Денес, таа е реновирана, обновена, енергетски ефикасна и доследна на својата цел. Ова беше истакнато на вчерашното свечено отварање и сечење на цервената лента во новите простории.
„Со тоа што инвестираме во Охрид одаваме посебно внимание и ја потврдуваме нашата посветеност во место каде што се корените на Охридска Банка. Ова претставува значајна инвестиција со која се зајакнува позицијата на банката на локалниот пазар и во регионот. Со речиси 20 000 клиенти физички и правни лица кои го гарантираат деловниот потенцијал, Охрид е во фокусот на нашето внимание“ – вели Бранка Павловиќ претседателот на УО на Охридска Банка.
„Сосиете Женерал“, ширум светот оддава посебна грижа, внимание и поддршка на локалната заедница. Во рамките на тоа Павловиќ, на директорот на општа Болница Охрид, д-р Љубен Арнаудов му врачи донација од 3 500 евра.
„Пријатно сме изненадени од овој гест, со тоа покажаа дека Охридска Банка е банката на нашиот град. Донацијата од 3 500 евра ќе ги намениме во купување на нова здравствена опрема“ – истакна Арнаудов.
Свое обраќање имаше и директорот на „Сосиете Женерал“, групацијата за Европа, г-динот Џанлука Соно. Тој кажа дека реновирањето на старото седиште на „Охридска банка“ има големо значење, за туристичкиот бисер.
„Јас не зборувам македонски, но ќе се разбереме, малку е чудно вака облечени во костуми и вратоврски а да се сретнеме на вакво прекрасно место за одмор, но овде имаме убав повод да презентираме зграда која има реновиран и обновен изглед. Со нејзиното реновирање сакаме да потврдиме уште еднаш дека станува збор за значајна членка на нашата групација и да ја потврдиме нашата приврзаност кон стратегијата. Сакам да им честитам на колегите кои се вработени во Охридска Банка за успесите кои што досега ги потврдуваат. Како „Сосиете Женерал“ присутни сме веќе 8 години и во присуство на гувернерот на РМ сакаме да потврдиме дека остануваме посеветени на Охридска Банка како членка на нашата групација“- изјави Соно.
Банката расте, се грижи за својот имиџ, за своите вработени и условите во кои работат, како и за своите клиенти, истакна, гувернерот на НБ на РМ Димитар Богов. Додаде дека Охридска Банка е почитувана во банкарскиот сектор која добро се развива чекор по чекор и влезена е во групата на големи банки, а нејзината профитабилност од година во година е се подобра.
{loadposition content9}
