Skip to main content

Иван Лотески најсреќен во Охрид

Иван Лотески најсреќен од стотината капачи кои денес запливаа во ладната езерска вода со желба да го фатат Светиот крст.

 |  Јаковлева Лионела  | 

Иван Лотески најсреќен од стотината капачи кои денес запливаа во ладната езерска вода со желба да го фатат Светиот крст. Овај 27годишен варошанец за Водици се капи од својата 12-та година, а ова е прв пат да го фати крстот.


Чуството е одлично прекрасно, се чуствувам многу убаво, скокам веќе 14 години и го чекав овај момент многу долго. Секоја година бев среќен ама оваа сум најсреќен. Ова е еден од најубавите празници за охриѓани и да го славиме уште помасовно, да има мир и љубов кај сите, многу здравје и нека е за многу години, им порача Лотески на сите христијани.


Денес на градскиот плоштад имаше неколку илјади граѓани кои го проследија настанот за одбележување на големиот верски празник Богојавление-Водици. Покрај охриѓани имаше и многу домашни, но и странски гости кои воодушевено ги следеја случувањата.


И оваа година манифестацијата Богојавление-Водици беше во организација на Дебарско- кичевската епархија во соработка со локалната самоуправа.


Задоволни сме. Имавме една убава организација, фаќањето на крстот измина во најдобар ред и им посакувам на охриѓани да го сакаат градот и заедно да направиме многу повеќе за неговиот развој, рече градоначалникот Јован Стојаноски.

Во организацијата на Богојавление- Водици своја поддршка дадоа и јавните претпријатија, Црвен крст, нуркачкиот центар „Амфора“, како и фаќачите на светиот крст од минатите години. Организацијата помина во најдобар ред без никакви инциденти или поголеми пропусти.