Дел од угостителите продолжуваат со лошото поведение од минатаото непочитувајќи ја Програмата за поставување урбана опрема. Новата локална самоуправа и угостителите разговараа и се договорија каде и во кој временски период може да се поставува урбана опрема маси и столици и колку за тоа ќе и плаќаат на општината. Најголем дел од договорите се потпишани а масите и столиците си се поставуваат без оглед на тоа што им пишува на угостителските објекти во одобрението. 
„Се што е надвор од одобрението издадено согласно Програмата за поставување на урбана опрема понатака претставува инспекциски надзор. Се издава решение за отстранување на вишокот поставени маси и столици или кои се поставени вон определеното време за кое што е издадено одбрението, а после решението следува и физичко отстранување. И нема тука што повеќе да се филозофира. Ако не се почитуваат инспекциските наредби од страна на угостителите тогаш се одзема одобрението.“ – изјави Јован Стојаноски – Градоначалник на Охри.
Инспекцискиот надзор на терен не кореспондира со цврстиот став на Градоначалникот дека нема да толерира самоволие и узурпирање на јавни површини со маси и столици надвор од она што е предвидено со Програмата. Но и тоа не е некоја тешка филозофија, едноставно општината кубури со инспектори. 
„Инспекциските служби на општината ако сте забележале во оваа сезона засилено работат со онаа објективна забелешка која мора да ја дадеме и да ја знаат и жителите на нашата општина а тоа е дека, за жал, во општина Охрид , како што е случај со многу општини како и во многу држави, ние имаме само еден градежен и еден комунален иснпектор. За да имаме повеќе ние во наредните денови ќе го распишиме конкурсот за градежен инспектор, за да го зајакнеме инспекцискиот надзор и со тоа би имале една правилна регулација на поставувањето на маси и столици а тоа значи правилна примена на Програмата.“ – вели Стојаноски.
Програмата за урбана опрема треба да произлегува од една интегрирана сообраќајна студија која Охрид во моментов ја нема, вели Градоначалникот. Избран е изготвувачот на студијата и според најавите, градот може да се надева дека наредната година голем дел од проблемите во централното градско подрачје , меѓу кои и поставувањето урбана опрема, ќе бидат решени врз основа на стручна анализа и научни параметри.
