Подновениот состав на охридскиот ракометен клуб утревечер ќе го има првиот настап пред домашната публика во натпреварот од второто коло од машката ракометна супер лига против РК Бутел – Скопје. 90% од екипата се нови играчи, имаме целосно нова бековска линија, потребно ќе ни биде време да се уиграме, вели капитенот на РК Охрид, Крсте Андоноски. Атмосферата во екипата е на многу високо ниво бидејќи оваа година ги имаме сите неопходни услови за нормално функционирање на еден клуб. Не очекува тежок и неизвесен натпревар но се помалку од победа не е опција за нас, вели Андоноски.
„Квалитетот на екипата можеби е малку послаб од минатите две години но тоа не значи дека немаме шанса за плеј оф туку напротив, мислам дека имаме една квалитетна екипа која доколку навреме се уигра и пред се ова е многу важен натпревар, можеби натпревар на сезоната, ако го добиеме мислам дека имаме и големи шанси за плеј оф.“– кажа Андоноски – капитен РК Охрид.
Пред охридските љубители на ракометот на утрешниот меч деби ќе има новото засилување на клубот, десниот бек Лазар Петровиќ. На србинот ова му е прв ангажман во странство и вели дека е презадоволен од условите во клубот и од тоа како е прифатен од соиграчите и стручниот тим.
„Пред се ја повикувам публиката да дојде во што поголем број и да ни ја даде неопходната поддршка бидејќи ова ни е многу важен натпревар. Што се однесува до играчите, ние ќе го дадеме максимумот да го добиеме овај натпревар и да влезиме во серија на победи“ – кажа Петровиќ.
Претстојната сезона за РК Охрид е пресвртница. Раководството го стегна ременот во поглед на трошењето и се плаќаат долговите од предходните години.
„Мислам дека околу 80 % од старите долгови веќе се исплатени. Мислам дека оваа година ќе биде стаби.лизациона во поглед на буџетот. Обезбедивме една релативно млада екипа во којашто предничат играчи од 19 до 25 години.“ – изјави Горан Недески – Спортски директор РК Охрид
Натпреварот меѓу РК Охрид и скопски Бутел се игра в сабота со почеток во 19 часот во СРЦ Билјанини Извори, а цената на билетот изнесува 50 денари.
