На пазарот на труд се чувствува недостаток од сите профили. Охридското стопанство е гладно за одредени стручни кадри со високо техничко образование, но и среднисти и занаетчии. На пазарот на труд има потреба од електротехничари, градежни работници од повеќе профили , заварувачи, машински инжинери, вели Маја Биткоска Ташковска директор на Агенцијата за вработување.
„ Има голема побарувачка за возачи но и нив ги нема на пазарот на труд. А побарување има. Владее незадоволство од понудената плата особено кај возачите кои возат во странство“, вели Биткоска Ташкоска.
Недостасуваат и високо стручни профили, како што се доктори, технолози, машински инжинери посебно од цнн струката. Во земјава се суфицитарни стоматолозите, но во Охрид се реткост невработени стоматолози. Но, ретки се и други стручни профили .
„ Има голема побарувачка за фармацевти и за земјоделски инжинери. Барани се на пазарот на труд, но ги нема. Некои се несоодветно вработени и треба да се направи баланс на стручните лица да се ангажираат според стручниот профил “ , појаснува Биткоска.
И понатака на пазарот на труд има вишок економисти, правници и од Факултетот за туризам и угостителство . Доколку изразат желба потребна е нивна доквалификација или преквалификација за да се вклучат на пазарот на труд. Во зимскиот период на евиденцијата за вработување се намалува бројот на активните баратели на работа. Mладите се снаоѓаат и заминуваат на различни сезонски работи во странство. Со тоа уште повеќе се зголемува потребата од работна сила во најразлични дејности на домашниот пазар на труд, нагласува Маја Биткоска Ташкоска.
