Младите се чувствуваат гневни, измамени и злоупотребени по измината една година локална власт на СДСМ и градоначалникот Јован Стојаноски. Нема никаква трага од изградбата на современи спортски и детски игралишта на повеќе локации во градот, констатира претседателот на Унија на млади сили на ВМРО-ДПМНЕ Охрид, Александар Здравевски.
„На потегот од улиците „Марко Цепенков“ и „Момчило Јорданоски“ во Горна Влашка маала градоначалникот Стојаноски вети фудбалско игралиште, но за жал наместо детски џагор и спортски натпреварувачки дух гледаме обрасната трева и несреден простор. Каде се ветените детски игралишта во Центар и Коњско?“ – јавно праша Здравевски.
Постојните детски игралишта се во лоша состојба, а нема никакви санирања на детското игралиште на улица „Васил Главинов“, ниту пак реконструкција на детското игралиште кај „Стобекс“ во Видобишта.
„Наместо нови детски игралишта, спортски терени полни со деца и младинци имаме оштетени реквизити, насекаде може да се забележи отпад, како и неискосена трева. Апсолутно никој не се грижи за нивното одржување.“ – кажа Здравевски.
Создавањето услови за спортување и правилен физички развој на младите треба да бидат врвен приоритет за секоја власт,потенцира Здравевски и обвини дека СДСМ и Стојаноски воопшто не се грижат за интересите на младите.
