Skip to main content

Започнаа теренските проверки и вакцинации во охридските училишта

 Засега проверките на вакциналните служби  покажуваат дека многу мал е бројот на невакцинирани основци до 14 години.  Разговорите на стручните лица со родителите даваат резултати во  зголемување на процентот на имунизација на децата во општина Охрид.

 |  Валентина Неловска  | 

Вакциналните служби ја започнаа реализацијата на наредбата од Министерството за здравство за спречување на епидемијата од морбили која е прогласена во земјава. Се прават проверки во вакциналните картони во службата за вакцинации , но и теренски активности во охридските основни училишта за учениците до 14 години, информира д-р Соња Мариноска,раководител на службата за вакцинации. Денес, вакциналниот тим беше на терен во ОУ„ СВ Климент Охридски“ каде што проверките протекоа во најдобар ред, а за тоа приодонес имаа директорот на училиштето Наташа Танеска и родителите. Имунизацијата од морбили е единствениот најефикасен начин да се спречи ширењето на заразната болест, укажува д-р Мариноска. Таа додава дека во Охрид во првите три месеци од оваа година се зголемил бројот на вакцинирани предшколски и училишни деца од морбили за над 92 проценти.

„ Во нашиот град нема голем број случаи да одбиваат вакцинации. Тоа се неколку случаи. По разговорот со нас и со вакциналните тимови родителите доаѓаат до сознанија дека децата треба да примат вакцина. Благодарение на кампањата на Министерството за здравство е зголемен одѕивот за вакцинирање, “ напоменува д-р Мариноска.

Наша задача е да им ги објасниме на родителите ефектите од имунизацијата против мали сипаници, а за која се водеше подолго време силна антивакцинална кампања, како и календарот со вакцини кои се пропишани според Правилникот за вакцини од ресорното министерство, подвлекува д-р Мариноска. Додава дека имаат добра соработка со ЦЈЗ и со Државниот здравствен и санитарен инспекторат.

„ Задолжени сме да даваме извештај за децата кои се уредно поканети, а не дошле на вакцина. Наредната недела ќе треба да доставиме список до Државниот здравствен и санитарен инспекторат за децата кои не дошле да примат вакцина“, напоменува д-р Мариноска.

Вакцините против морбили се бесплатни и ги има во доволни количини, напоменува д-р Мариноска. Во проверка на вакциналните картони се вклучени патронажните сестри и се организирани тимови кои работат и попладне во Вакциналната служба. Вакционалиот стутус се проверува на сите здравствени работници, студенти по медицина, фармација и стоматологија, како и на учениците во средните медицински училишта.