Совршено го опишавте Охрид во времето кога Вие и Вашата партија бевте на власт. Престанете да мислите дека охриѓани имаат кратко помнење како Вас, се вели во соопштението од Градоначалникот Константин Георгиески со кое реагира на изнесеното на прес конференцијата од страна на претседателот на ОК на ВМРО ДПМНЕ Охрид, Сашо Донев. Во реакцијата од Градоначалникот се вели дека граѓаните се сеќаваат на летните сезони со реквизити за урбана опрема на секој чекор, на целата улица „Кеј Македонија“ кошаркарски и боксерски реквизити, улицата „Ванчо Николески“ беше претворена во базен и насекаде тезги со секакви производи.
„Реално е да се каже дека Охрид ова лето беше чист и уреден како никогаш до сега и за тоа добивме пофалби од сите посетители. Дали знаете колкава енергија треба за тоа? Нормално дека не знаете затоа што никогаш истото го немате постигнато.
Сигурно добро знаете, но сакам јавно да Ве запрашам што ни остави Вашата локална власт во наследство? Јавни претпријатија со по 5 неисплатени плати, нерешени плажи, општина со огромни долгови, нула проекти …. Во секое делче пустош.
Ме повикувате за проектот за Али Пашина Џамија , на кој Вие му дадовте конзерваторска дозвола и заверен проект со минаре. Ме повикувате за Хотелот во Лагадин на кој Вие му дадовте одобрене, а јас донесеов решение за ништовност, кое за прв пат Второстепена комисија го потврди. Ме повикувате за Градскиот пазар, кој Вие го почнавте со непрецизен и недефиниран договор, кој е проблем и за инвеститорот и за Општината .
Што направивте Вие за регулација на сообраќајот во Стариот дел на градот? НИШТО … така го оставивте да се гуши во возила. Знаете ли дека една од препораките на УНЕСКО е редуцирање на сообраќајот во овој дел на градот.
Ние до сега покажавме дека навистина сериозно, одговорно и одлучно се залагаме за зачувување на статусот на УНЕСКО, со презцизни мерки и активности. Што направивте и што постигнавте Вие на ова поле? Да не заборавиме дека првата реактивната мисија на УНЕСКО беше во Охрид, кога Вие и Вашата партија бевте на власт.
Господине Донев, Ви предлагам да ја зајакнете Вашата пр-стратегија и не по една, да започнете да организирате по две прес-конференции на ден, кои апсолутно немаат никаква смисла, ни ефект.“ – стои во реакцијата од Градоначалникот Константин Георгиески.
