Skip to main content

Харфистот Емануел Сејсон вечер на „Охридско лето“

Првата половина од своето 57. фестивалско издание „Охридско лето“ ќе ја заокружи со вечерашниот концерт на светски познатиот виртуоз на харфа, маестро Емануел Сејсон од Франција.

 |   | 

Првата половина од своето 57. фестивалско издание „Охридско лето“ ќе ја заокружи со вечерашниот концерт на светски познатиот виртуоз на харфа, маестро Емануел Сејсон од Франција.

Сејсон има студирано харфа на Конзерваториумот во Лион, а подоцна и на Парискиот конзерваториум во класата на Изабел Морети. Од 2005 година неговата успешна кариера го води во некои од најпрестижните концертни сали како „Вигмор хол“ во Лондон, салата „Гаво“ во Париз, „Карнеги хол“ во Њујорк, „Концертхаус“ во Виена, салата на Берлинската филхармонија и многу други. Во 2004 година Сејсон се закитува со златниот медаљ на Интернационалниот натпревар за харфисти во Блумингтон (САД), каде ја добива и специјалната награда за најдобра изведба.

Тој е добитник на прва награда и шест специјални награди на аудициите за млади музичари во Њујорк во 2006 година, а во 2009 година победува на престижниот натпревар „АРД“ во Минхен. Во 2010 година е номиниран во категоријата „Најдобар инструменталист “ на изборот „Викторис де ла музик класик“ во Франција, а во 2011 година е добитник на наградата за развој на кариерата од страна на Францускиот институт за уметности.

Во периодот од 2006 до 2015 година Емануел е соло-харфист во оркестарот на Париската национална опера. Тој е редовен гостин на фестивалот во Картагена (Колумбија), одржува мајсторски курсеви во Ница и е главен предавач на мајсторскиот курс поддржан од Фондацијата „Салви“. Во моментов Емануел Сејсон е соло-харфист на операта „Метрополитен“ во Њујорк и предава харфа во школата за музика „Менс“.

За вечерашниот концерт на маестро Сејсон е резервирана фестивалската сцена во катедралната црква „Света Софија“, со почеток во 20:30 часот. На програмата се дела од Бах, Шпор, Рение, Дебиси, Форе и Салзедо.