Делегација на Црвен крст Охрид положи свежо цвеќе пред бистата на Анри Динан пред седиштето на организацијата. Големиот хуманист Анри Динан, основоположник на идејата за Движењето на Црвениот крст е роден на 8-ми мај 1828 година. Во негова чест овој датум се одбележува како Светски ден на Црвен крст и Црвената полумесечина. Охридската организација по тој повод ќе спроведе низа активности.
Во вторник ќе се спроведе крводарителска акција во Факултетот за туризам и угостителство наменета за студенти и за сите граѓани. Во среда ќе се одржи инфо ден кога пред дечињата од градинките и заинтересирани граѓани ќе ги промовираме нашите активности и ќе имаме голема продажна хуманитарна акција на 14-ти мај во сабота, а собраните средствата ќе бидат донирани за деца од социјално загрозени семејства и мигранти од Украина – истакна Весна Терзиоска, потпретседател на Црвен крст Охрид.
Црвен Крст Охрид има многу алатки за регрутирање на млади лица волонтери и интересот за волонтирање во организацијата во континуитет е голем, вели Терзиоска.
Интересот е голем. Во моментов тече проектот на ПХВ, каде младите во групи изработуваат четири проекти со кои ќе се помага на социјално загрозените семејства, ја подигнуваат еколошката свест и го градат интеркултурното општество преку работилници за промоција на мир и соживот. Се обидуваме да ги задржиме младите волонтери и да им ги дадеме потребните алатки за да може да функционираат и да направиме подобро општество за сите – кажа Терзиоска.
Терзиоска открива дека бистата на Анри Динан во Охрид е единствена во државата и истата е донесена од Женева како подарок од неговото семејство. Таа најави дека во следниот период делегација од ОО Црвен крст Охрид ќе ја посети Женева каде ќе оддаде благодарност за донацијата.
