Во монсунските бури во Бангладеш и Индија загинаа најмалку 41 лице. Невремето предизвика разорни поплави кои оставија милиони домови под вода и ги прекинаа транспортните врски, соопштија денеска властите.
Поплавите се редовна закана за милиони луѓе во нискиот Бангладеш, но експертите велат дека климатските промени ја зголемуваат нивната фреквенција, жестокост и непредвидливост.
Немилосрдните дождови во текот на изминатата недела поплавија огромни делови од североисточниот дел на Бангладеш, при што војници беа распоредени за да ги евакуираат домаќинствата отсечени од соседните заедници.
Училиштата се претворени во засолништа за помош за да се сместат цели села кои беа поплавени за неколку часа од реките кои ненадејно се излеале од коритата.
Од петокот попладне молњите предизвикани од бурите убиле најмалку 21 лице низ јужноазиската држава, изјавија полициски претставници за АФП. Меѓу нив имало и три деца на возраст меѓу 12 и 14 години кои биле погодени од гром во петокот во руралниот град Нандаил, изјави началникот на локалната полиција Мизанур Рахман.
Уште четири лица загинале при лизгање на земјиштето кон нивните куќи на ридот во пристанишниот град Читагонг, изјави за AFP полицискиот инспектор Нурул Ислам.
Поплавите во Бангладеш се влошија во саботата наутро, потврдија властите. Поради тоа, третиот по големина меѓународен аеродром во Бангладеш во Силхет мораше да се затвори во петокот.
Синоптичарите соопштија дека поплавите ќе се влошат во следните два дена со обилни дождови во Бангладеш и во североисточниот дел на Индија.
Пред овонеделните дождови, регионот Силхет сè уште се опоравуваше од најлошите поплави во речиси две децении на крајот од минатиот месец, кога најмалку 10 луѓе загинаа, а четири милиони други беа погодени.
