Агенцијата за промоција и поддршка на туризмот континуирано го поддржува развојот на еко туризмот и растот на одржливите форми на туризам, паралелно со зачувување на природата и животната средина.
Во постојаната комуникација со туристичкиот сектор и локалната власт ја согледавме потребата од подигнување на јавната еколошка свест и придобивките од истата, во контекст на чисти туристички дестинации.
Со цел да мотивира и инспирира, Агенцијата за туризам започнува Еко кампања за дестинации без отпад, во нашата држава.
Истата ќе започне официјално денес, а ќе трае до 1-ви ноември, комуницирајќи преку социјалните медиуми фејсбук и инстаграм профилите на АППТ ќе бидат промовирани 30 дестинации под хаштазите #ЧистоКакоДома #PastërSiNëShtëpi.
Од Агенцијата за промоција и поддршка на туризмот објаснуваат дека во првата фаза за подигнување на еколошката свест за чиста животната средина ќе се обидат да допрат до граѓаните со креативните решенија и повикувачки слогани:
Дестинација која не е погодна за одгледување пластика на плажите!
-Искорнете го ѓубрето, не вреди да се гази!
-На улици не се сее ѓубре, засади дрво за град кој диши!
Во втората фаза од еко кампањата влијателни луѓе од јавниот живот преку кратки видеа од одредена дестинација, со свите позитивни примери ќе допрат до граѓаните.
Во третата фаза вработените во секторите на АППТ во соработка со локалната самоуправа и граѓаните со индивидуални акции ќе ги пошумуваат опожарените туристички локации во Македонија.
Ги повикувам сите заинтересирани институции, туристички работници и еколошко свесни граѓани да ја споделат иницијативата за промовирање на дестинации без отпад. Ајде сите заедно да ја смениме перцепцијата за нашата држава, да биде препознаена од странските туристи како чиста и еколошки одржлива дестинација. Странските туристи не се главните загадувачи на дестинациите кои ги посетуваат, мораме да си признаеме дека отпадот не е донесен од друга планета – изјави директорот на АППТ, д-р Љупчо Јаневски.
