Почнувајќи од четврток во следните три денови на овој празничен викенд на градскиот кеј, ќе се одржи првиот фестивал на виното. На него ќе бидат промовирани македонските и охридските автохтони вина, но ќе учествуваат и винарии од соседството и европските земји.
Целта на манифестацијата е продолжување на летната туристичка сезона.
Ќе донесеме десетина винарии македонски и неколку увозници на вино. Исто така вина ќе има и од Шпанија, така да мислам дека ќе има една голема понуда на вина, да се проба, да се дегустира вино – вели Пане Темов, организатор на вино-фест Охрид.
Покрај штандовите со квалитетно вино, кое ќе може да се дегустира по економски цени за забава ќе бидат задолжени охридските бендови „Камелеон“ и „Бекдор бенд“ , а свој настап ќе има и Ѓоко Танески. На Фестивалот ќе настапат и Дј Винофест, Фолтин, Александар Јосифовски, Ареа, Наум Петрески, Нина Јанева и Суперхикс.
Ние имаме разговарано, многу години дека е потребен еден поголем фестивал од Скопје, каде што винариите од соседството сакаат да дојдат во Охрид. Не за маркетинг, туку како фестивал и ситуација која ќе ја разгледуваме со градоначалникот понатака да направиме многу добар фестивал каде што ќе може да ја промовираме земјава бидејќи Македонија е винска земја и сакаат да се претстават голем број винарии од странство кои купуваат грозје од кај нас – додава Темов.
Намерата наша како локална самоуправа за она што треба да трае отсега понатаму како вино фест секако дека нотата односно ќе кажам дека нотата и изгледот ќе го даваат секогаш охридските изведувачи оние кои успеале да станат бренд и го претставуваат градот – кажа градоначалникот Кирил Пецаков.
Вино фестивалот се планира да премине во традиција, идната година да биде збогатен и помасовен, но поради есенската берба на винариите ќе се одржува на стартот на туристичката сезона.
Новинар : Соња Рилковска
