Во Охрид е мал бројот на имунизирани деца со МРП вакцина. Се пробиваат тремините од календарот за имунизација и ревакцинација, информира д-р Соња Мариноска, раководител на службата за здравствена заштита на деца и младинци. Интересот кај родителите опаѓа за да ги донесат децата за да се вакцинираат посебно за МРП. Оваа вакцина штити од вируси на заразните заболувања морбили, рубела и паротитис.
Со нормализирање на животот апелирам родителите да не ја одложуваат вакцинацијата кај децата туку да ги донесат во вакциналната служба на определниот термин. Многу е важно вакцинацијата да се прими и заврши навреме. Доколку не се вакцинираат и ги остават децата незаштитени се во ризик да заболат – истакна д-р Мариноска.
Одолговлекувањето на имунизацијата со МРП и пробивање на вакциналниот календар се должат на неколку фактори, информира д-р Мариноска. Ги набројува антиваксиналните кампањи, долгиот период на пандемијата со Ковид 19 и насочувањето на медицинскиот кадар во имунизацијата против ковид 19, како и појавата на неоснован страв кај родителите.
Родителите се плашат да ги донесат децата и ја одложуваат вакцинацијата поврзувајќи ја со аутизмот. Научните достигнувања покажуваат нема поврзаност меѓу вакцината и аутизмот. Невролошките експерти можат во рана возраст да ги препознаат знаците на аутизмот пред да ги препознаат родителите. Родителите ги забележуваат меѓу 18 и 25 месечна возраст кога се прима МРП вакцината и ги поврзуваат последиците – вели д-р Мариноска.
Имунизацијата во земјава е задолжителна според Законот за заштита на населението од заразни болести. Индикатор за успех на реализација е процентот на опфат. Во нашата земја, последниве години процентот е во опаѓање за сите вакцини, а посебно за МРП вакцината.
