Се зголемува бројот на лица со бубрежно заболување

Се зголемува бројот на лица со хронично бубрежно заболување, предупредуваат од Центарот за дијализа „Диаверум“ Македонија по повод Светскиот ден на бубрегот, кој се одбележува секој втор четврток во март.

Димитар Клисаровски, директор на Центарот за дијализа Диаверум Македонија, посочува дека бројот на пациенти на дијализа во моментот е во пораст за 4% на годишно ниво во „Диаверум“ Македонија, кој тренд веројатно се случува и во останатите центри во државата. Ова не е за изненадување со оглед на тоа што во светски рамки се бележи зголемување на бројот на лица кои страдаат од дијабет и хипертензија, а истите се главен ризик фактор за појава на хронично бубрежно заболување. За да се спречи прогресијата на болеста, најважно е раното откривање на болеста преку редовни превентивни прегледи и соодветен третман.

Во рамки на одбележување на Светскиот ден на бубрегот, Диаверум подели алки за заштита на раката на дијализните пациенти, на која е креирана фистула преку која се изведува процесот на хемодијализа. Овие алки имаат порака „не боцкај и не мери притисок на оваа рака” со намера да ги заштити пациентите од потенцијални проблеми со фистулата, која може да се оштети при интервенции од страна на други здравствени лица. Исто така, Диаверум организираше низа едукативни предавања за пациентите, средношколците и останати граѓани во насока на зголемување на свесноста за бубрежното здравје.

Фернандо Макарио, главниот медицински директор на глобалниот провајдер за бубрежна нега Диаверум, вели дека до 2040 година, хроничната бубрежна болест ќе биде петта најчеста причина за смртност на светско ниво.

Многу луѓе со хронична бубрежна болест немаат симптоми, бидејќи оваа болест обично не предизвикува забележителни симптоми сè додека не дојде во напредна фаза. Тоа се случува бидејќи телото обично успева да се справи со значителното намалување на бубрежната функција. Честопати, дијагнозата се поставува кога пациентот се тестира за друга состојба и тестот на крвта и на урината укажува на потенцијален проблем. Во подоцнежна фаза на болеста може да се развијат повеќе симптоми, како што се чувство на замор и малаксаност, сува кожа, чешање, главоболки, почесто ноќно мокрење, губење на апетит, мускулни грчеви, мачнина, отежнато дишење (поради собирање течност во белите дробови), несоница, губење на концентрација – вели Макарио.

Затоа, според него, здравствената писменост игра клучна улога кај пациентите на дијализа со цел активно да се вклучат во нивното лекување. Многу луѓе се соочуваат со медицински информации што опфаќаат бројки и статистики витални за нивното здравје и добросостојба.

Во Диаверум сметаме дека здравствената писменост е клучен елемент на нашето ветување дека на нашите пациенти ќе им обезбедиме бубрежна грижа која ќе им го подобри животот, збогатувајќи го нивното знаење и овозможувајќи да бидат активни учесници во донесување одлуки за нивниот медицински третман и во грижата за себе – вели Макарио.