Мониторинг мисијата на Унеско идниот месец повторно доаѓа на увид во Охридскиот регион.На терен ќе се проверува до каде е спроведувањето на препоркаите. Најголем дел од обврските се на општините, вели министерката за култура. Таму каде не се почитува мораториумот за градба и се изградени дивоградби ќе мора да постапи државниот градежен иснпекторат.
„Знаете дека законот за легализација на бесправно изградените градби е повторно повлечен од законска процедура токму поради забелешките на националната комисија на УНЕСКО, каде што реагиравме дека не може се што е изградено во заштитено подрачје да се прогласи за легална градба” , вели Бисера Костадиновска Стојчевска министерка за култура.
Струга до денес не изготви Регистар на дивоградби, но преку новиот софтвер од НП Галичица се скенира целиот терен кој ќе ги открие нелегалните градби.
„Заедно со НП Галичица, направено е скенирање на целиот терен на Охридскиот регион и ќе утврдиме што е тоа што е дивоградба во општина Струга независно од тоа што општина Струга тврди. Општина Струга има поднесено повеќе предмети до Националната комисија на Унеско, но се дозволија само неколку кои беа по закон”, додава Стојчевска.
Уривање на дивоградби и ограничување на градбите во старото градско јадро се само дел од задолженијата што им ги даде Владата на надлежните институции по препораките на УНЕСКО.
Новинар Соња Рилковска
