Десeтици откажани аранжмани, пропаднати авио билети и платено сместување во странство. Промената на патните исправи доведе до откажување голем број закажани туристички и деловни патувања. Голем број граѓани кои уште во декември го започнале процесот на промена на документи, се уште немаат пасоши.
Од туристичките агенции во Охрид велат финансиски импликации имаат и граѓаните и агенциите.
„Имаме проблем во работењето заради промената на новите документи со новото име. Заради доцнењето на пасошите и личните карти имаме навистина проблеми во работењето. Закажани аранжмани, патниците не можат благовремено да ги добијат своите патни исправи и тука се создаваат доста проблеми во работењето” , вели Загорка Георгиеска туристички работник од Охрид.
Туристичките агенции стравуваат дека поради доцнењето на пасошите, ќе има откажување и на редовните екскурзии на учениците.
„Почнуваат средношколкските екскурзии кои што учениците со нетрпение ги очекуваат но со овој тренд ако се продолжи ќе се соочиме со проблеми , ќе има ученици кои што нема да успеат да извадат пасоши и замислете какво ќе биде чувството некое дете да оди на ексурзија а некое да не оди. Ќе имаме доста непријатни ситуации за децата а и за нас како туристички агенции бидејки ние однапред плаќаме и хотели и останати услуги”, вели Јаким Маленко туристички работник од Охрид.
Од туристичките агенции велат трпат сериозни загуби, бидејки се соочуваат и со откажување на аранжманите за 8 ми март и за Велигденските празници, поради тоа што граѓаните не знаат дали ќе ги добијат новите патни исправи.
Новинар Соња Рилковска
