Инфлацијата мерена преку индексот на трошоците за животот во април во однос на март изнесува 0,7 проценти, а цените на мало се зголемени за 1,1 процент, според податоците од Државниот завод за статистика. Во однос на април лани, трошоците на живот се зголемени за четири проценти, а цените на мало за 3,5 проценти.
Зголемувањето на инфлацијата е резултат на зголемувањето на трошоците за животот во транспортот за 2,8 проценти, комуникации за 1,6 проценти, храна и безалкохолни пијалаци, облека и обувки за 0,9 проценти, рекреација и култура, ресторани и хотели за 0,6 проценти, разновидни стоки и услуги за 0,4 проценти и здравје за 0,2 проценти.
Намалување на трошоците за живот е забележано во групите мебел, покуќнина и одржување на домаќинствата за 0,5 проценти и домување, вода, електрика, гас и други горива за 0,2 проценти.
На исто ниво останале трошоците за живот во групите алкохолни пијалаци, тутун и наркотици и образование.
