Норвешка ја потврди доминацијата во супервелеслаломот на Зимските Олимписки игри откако синоќа Аксел Лунд Свиндал го освои златниот медал и го наследи Кјетил Андре Омот, двократниот олимписки шампион. И Американците повторно имаа радосни моменти откако Боде Милер ја освои втората позиција, а изненадување направи Ендрју Вајбрехт со третото место.
Полека и нордијците на Норвешка излегуваат од кризата. Марит Бјерген по осмиот ден е најуспешната на Игрите со три медали – две златни. Бјерген на крос кантри трката 15 километри пурсуит (7,5 километри класично + 7,5 километри слободно) ја задржа предноста и триумфираше пред Ана Хаг од Шведска, која пак за 4 десетинки беше побрза од Јустина Ковалчук од Полска.
Велика Британија е 26-тата држава која освои медал во Ванкувер откако Еми Вилијамс беше најбрза на скелетон трките, пред Германките Керстин Симковјак и Ања Хубер.
Кај мажите нов златен медал за Канада донесе Јон Монтгомери, среброто му припадна на Мартинс Дукурс од Летонија, а бронзата ја освои Александар Третјаков од Русија.
На натпреварите во хокеј беше комплетирано 2.коло кое синоќа мина без изненадувања.
Во рамките на Б групата Чешка ја победи Летонија со 5:2, додека во дуелите од Ц групата Шведска – Белорусија 4:2 и Финска – Германија 5:0.
Денеска на деветиот ден од Игрите ќе бидат доделени медали во шест дисциплини: супервелеслалом кај жените, скокови на големата скокалница, машкиот крос кантри пурсуит 30 километри (15 класично + 15 слободно), трката на 1.500 метри мажи брзо лизгање и шорт трек 1.500 метри жени и 1.000 метри мажи.
{loadposition content}
