Во Основниот суд во Струга повторно е одложена главната расправа за судскиот процес против струшкиот градоначалник Рамиз Мерко за набавката на луксузниот автомобил „Ауди А6“, вреден 67 илјади евра и уште три други автомобили за општинските потреби.
Причина за одлагањето според судијката е тоа што одбраната достави обемна листа на докази, вкупно 68 вербални и писмени, која Судот треба да ги разгледа но и да прибави одредени документи од надлежните институции.
„Потребно е време и за обвинителството да се запознае со истите но и за судот. Интенцијата е да не одлагаат, судот ќе се потруди во најкраток можен рок документите кои и се потребни на одбраната да се обезбедат“, изјави судијката Надица Митреска.
Од судот велат нема да има одлагање, судскиот процес се очекува да заврши во разумен рок.
„Согласно принципот на судење разумен рок и ефикансост на постапката што е можно побрзо но со почитување на правата на одбраната, додава Митреска.
Основното јавно обвинителство за гонење на организиран криминал и корупција го гони струшкиот градоначалник за злоупотреба на службената положба. Според обвинението без претходно одобрување на Годишниот план за јавни набавки од страна на Советот на Општина Струга и без конкретната јавна набавка да биде предвидена во Одлуката за извршување на Буџетот на општината за 2018 година, спротивно на начелата на законитост и интегритет, како и спротивно на јавниот интерес во услови кога општината имала неподмирени долгови и блокирана жиро-сметка, набавил четири моторни возила во вкупна вредност од околу 114.000 евра, со што прибавил имотна корист за носителот на јавната набавка и го оштетил Буџетот.
Според обраната со доставувањето на оваа листа на докази одбраната ке се обиде да ја побие тезата на јавното обвинителство дека обвинетиот сторил некакво кривично дело воопшто.
Главната расправа е одложена за 8 јули во 13 часот.
Новинар Соња Рилковска
