Возило од обезбедувањето на претседателот на собранието Африм Гаши при неговото доаѓање во официјална посета на Охрид утрово излета на магистралниот пат Охрид-Кичево, во близна на Ново Село. Повредените лица од обезбедувањето беа пренесени во болница и се во добра здравствена состојба , според информациите на собранискиот спикер Гаши кој ги посетил повредените во болница. Од директорот на болницата Св Еразмо и докторите, Гаши бил информиран дека нема потешка повреда, но дека ќе бидат задржани на опсервација.
„Јас лично ги видов сите тројца припадници на обезбедувањето, сите се добри , контактибилни. Ми кажуваа како се случил настанот . За жал тоа е уште една порака за сите кои работат на патот Кичево Охрид да се работи побрзо и поквалитетно затоа што сите граѓани патат од тоа. Ниту еден од нас не е имун на такви работи, на секој граѓанин може да му се случи . Им посакувам побрзо да оздрават и на никого да не му се случи. “ – истакна Гаши.
Во 10.45 часот утрово во СВР Охрид било пријавено дека на автопатот во изградба Охрид-Кичево, во близина на селото Ново Село, општина Дебрца, излетало од патот патничко моторно возило „сеат алтеа“, сопственост на Министерството за внатрешни работи.
„ По преземените мерки од страна на полициски службеници утврдено е дека возилото било управувано од 37 годишен полициски службеник од Скопје, а во возилото се наоѓале уште двајца полициски службеници. По укажаната помош на местото на настанот од екипа од Итната медицинска помош, тие се пренесени во болницата „Св.Еразмо” во Охрид. “ – изјави Стефан Димоски – портпарол СВР Охрид.
По наредба на Јавен обвинител, увид на местото на несреќата извршија полициски службеници од Полициската станица за безбедност во патниот сообраќај Охрид.
