Шефот на единицата за биолошко и хемиско оружје на руската војска, генерал-полковник Игор Кирилов, е убиен заедно со неговиот заменик рано во вторникот во експлозија во Москва. Украински безбедносни извори изјавија дека Службата за безбедност на Украина (СБУ) го убила Кирилов во специјална операција.
Како што пренесоа утрово светските медиуми, цитирајќи го соопштението од Центарот за односи со јавноста на руската Федерална служба за безбедност, приведен е 29 годишен маж кој изјавил дека бил регрутиран од украинските специјални служби, а му била „гарантирана“ награда од 100 илјади долари и дозвола да се пресели во ЕУ во замена за убиството на Кирилов.
Оттаму додаваат дека по инструкции на Украина, тој пристигнал во Москва и изнајмил автомобил за да ја надгледува резиденцијата на Кирилов. Тој ја поставил експлозивната направа на електричен скутер, кој го паркирал на влезот од станбената зграда во која живеел Кирилов.
