Нов 400/110 kV трансформатор пристигна во Трансформаторската Станица (ТС) Битола 2. -Тоа претставува клучен чекор кон обновување на стабилноста на електроенергетската мрежа во Југозападна Македонија. Ова е значајна пресвртница во напорите на државата за справување со предизвиците во преносниот систем и обезбедување сигурно снабдување со електрична енергија во еден од најважните региони во земјата, информираат од МЕПСО.
-По дефектот на двата 400/110 kV трансформатори во ТС Битола 2, кои се случија во јануари 2024 односно јули 2024, новиот менаџмент на МЕПСО се соочи со голем ризик за енергетската стабилност во југозападниот регион. Во овој регион, кој покрива 25-30% од вкупната потрошувачка на електрична енергија во Северна Македонија, се работеше со големи напори, ослонувајќи се исклучиво на 110 kV далноводи. Договорот за набавка на трансформаторот е потпишан на 4 август 2023 година и досега не се реализирал со што била влошена состојбата на електроенергетската мрежа, се додава во нивното соопштение.
Со новиот трансформатор се очекува да се намали притисокот врз мрежата, подобрување на системската сигурност за реоните на Струга, Охрид, Ресен, Битола и Прилеп, да се обезбеди стабилно снабдување со електрична енергија за време на зимската сезона и сигурност на производството на електрична енергија во РЕК Битола, клучен снабдувач на електрична енергија во државата.
Трансформаторот, првично наменет за ТС Дуброво, беше пренаменет за ТС Битола 2 заради итните потреби на регионот.
Процесот на монтажа ќе вклучува составување, филтрација на масло, тестирање и интеграција во системот, што се очекува да трае приближно 10-12 дена, во зависност од временските услови. Техничките тимови на МЕПСО гарантираат дека монтажата ќе се заврши што е можно побрзо, и покрај предизвиците што ги носи зимскиот период.
Откако ќе биде оперативен, овој трансформатор ќе одигра клучна улога во стабилизирањето на мрежата, намалувањето на ризикот од каскадни прекини и исполнувањето на зголемените енергетски потреби за време на зимската сезона.
Монтажата на овој трансформатор во ТС Битола 2 не само што ќе ја стабилизира енергетската мрежа во Југозападна Македонија, туку и значително ќе го намали ризикот од прекини во снабдувањето за време на критичните зимски месеци.
АД МЕПСО ги уверува граѓаните дека се преземаат сите можни напори за обезбедување стабилно и сигурно снабдување со електрична енергија за регионот и пошироко.
