Украина повторно ја нападна Русија со дронови, привремено затворени сите аеродроми во Москва

Градоначалникот на Москва, Сергеј Собјанин, преку каналот Телеграм изјави дека воздушната одбрана спречила напад на 19 беспилотни летала што летале во правец на Москва, а биле пресретнати и други 105 дронови на територијата на Русија. „Би-би-си“ јави дека ова е втора ноќ по ред како руската престолнина е изложена на ваков напад.

Руската агенција за цивилно воздухопловство „Росавијација“ воведе привремена суспензија на летовите на аеродромот Домодедово, еден од најголемите во Московскиот регион, околу 02:38 часот по локално време, за да се гарантира безбедноста на воздушниот сообраќај.

Инаку, во Москва треба да се одржат церемониите на 9 мај по повод Денот на победата над нацистичка Германија во 1945 година и крајот на Втората светска војна на Стариот континент. На парадата треба да присуствуваат странски лидери, кинескиот претседател Си Џинпинг, бразилскиот претседател Луис Ињасио Лула да Силва и други. Рускиот претседател Владимир Путин објави дека ќе спроведе тридневен прекин на огнот од 8 до 10 мај, додавајќи дека ова ќе биде тест за тоа дали Украина е расположена за мир.