Обвинителот Љупчо Коцевски на денешната прес-конференција информираше дека приведени се десетина вработени во Управата за јавни приходи, а во моментот се вршат претреси на локации поврзани со овие лица.
-Јавноста беше запознаена дека се водеше предистражна постапка за лица кои беа вработени во УЈП, а поврзани на некој начин со кочанскиот предмет. Во текот на минатиот ден и денеска се преземаат дејствија. Денеска се приведени околу десетина лица и во моментов се вршат претреси на одредени локации кај лицата опфатени со кривичната пријава, рече обвинителот Коцевски.
Според првичните сознанија на Обвинителството, осомничените се товарат за кривични дела примање и давање мито, како и за злоупотреба на службената положба и овластувања.
Главниот јавен обвинител истакна дека во моментов не може да соопшти за кои лица се работи, дека јавноста ќе биде запознаена откако ќе се земат генералиите, а за мерките што ќе бидат предложени против приведените ќе биде донесена одлука откако ќе бидат земени изјавите од приведените.
