Новиот македонски долгометражен игран филм „17“ на режисерката Косара Митиќ ќе ја има својата светска премиера на 76. Берлински филмски фестивал во февруари, во натпреварувачката селекција „Перспективи“. Продуцент на филмот е Томи Салковски и „Црна мачка продукција“. Информацијата беше соопштена денес на прес-конференција во Берлин. „Перспективи“ е програма посветена на најдобрите дебитантски филмови на светско ниво.
„17“ ќе биде оценуван од тричлено интернационално жири кое ќе одлучи кој од 14-те долгометражни дебитантски филмови ќе ја освои наградата за најдобар филм во оваа програма.
Во филмот играат актерките Ева Костиќ, Мартина Даниловска, Даме Јовески, Ева Стојчевска, Петар Маниќ и др.
Филмот „17“ ја следи приказната за седумнаесетгодишната Сара, која заминува на училишна екскурзија криејќи тајна за која никој не знае. Кога екскурзијата ќе излезе од контрола и таа ќе стане сведок на насилство врз нејзината соученичка Лина, двете девојки ќе се поврзат засекогаш.
Филмот е поддржан од Агенцијата за филм на Северна Македонија, Филмскиот центар на Србија, Словенечкиот филмски центар, СЕЕ Синема Нетворк (SEE Cinema Network), како и програмата CineLink Work in Progress на 31. Сараевски филмски фестивал.
76. издание на Берлинскиот филмски фестивал ќе се одржи од 12 до 22 февруари, а селекцијата на „17“ претставува уште еден значаен успех за македонската кинематографија на меѓународната сцена.
