Народен театар Охрид ги поканува граѓаните на две специјални хуманитарни претстави, каде уметноста добива уште подлабока смисла – да помогнеме таму каде што е најпотребно.
На 26 март премиерно ќе биде изведена детската претстава „Чаплин во црно-белиот свет“, во режија на Ѓорѓи Ризески, а на 27 март, по повод Меѓународниот ден на театарот, ќе се одигра претставата „Парите се отепувачка“, во режија на Андреј Цветановски.
Претставата „Чаплин во црно-белиот свет“ на 26.03.2026 е со почеток во 19:00 часот, цена на билет 150 денари. Претставата „Парите се отепувачка“ на 27.03.2026 е со почеток во 20 часот и цена на билет 300 денари.
Сите средства од продажбата на билети од двете претстави ќе бидат донирани за лекувањето на Ева.
-Ова е можност преку театарот да направиме нешто навистина значајно. Да покажеме дека заедно можеме повеќе. Да наполниме сала. Да подариме надеж. Да помогнеме, порачуваат од Народен театар Охрид.
