Овој рамазански продолжен викенд, Охрид е повторно полн со живот. Празничната атмосфера, пријатното време и голем број туристи означуваат увертира во новата туристичка сезона. Гости од земјава и странство го раздвижија градот. Празникот традиционално носи и голем број иселеници кои се враќаат во родниот крај.
„Секако, Рамазан Бајрам е еден од поголемите празници. После 30-дневниот пост, многу наши сограѓани кои живеат надвор од државата доаѓаат во посета на своите блиски, но и да го прослават празникот тука”, изјави Челик Асим, туристички работник.
Туристичкиот сектор внимателно ги следи глобалните случувања. Настаните на Блискиот Исток носат одредена загриженост, но и можност за пренасочување на туристичките текови.
„Сите тие случувања на Блискиот Исток не значат дека туристичките дестинации ќе исчезнат, туку дека ќе се пренасочат кон други, побезбедни места. Се надевам дека и Балканот, односно Македонија, ќе биде дел од тоа, како што е случај и во моментов. Така што очекуваме една нормална туристичка сезона, слична на минатата”, изјави Челик Асим.
Во меѓувреме, туристичкиот сектор веќе влегува во завршна фаза од подготовките за главната сезона. Туристичките работници остануваат оптимисти и очекуваат стабилна летна сезона.
Новинар Соња Рилковска
