Засилени контроли во туризмот,  можност за воведување туристичка полиција

Наместо домашни, странски туристички водичи  ја искривуваат историјата. Дополнителен предизвик е  непријавувањето на туристите, со што се избегнува плаќање туристичка такса и  данок на остварени приходи од  закуп. Бројот на регистрирани станоиздавачи во Охрид е во пораст, но дел од нив работат во сивата зона.

Надлежните велат  контролите се интензивираат.

„Имаме служба во одделението за инспекциски надзор, туристички инспектори кои излегуваат на терен и вршат контрола над нивното работење. Исто така и полицијата има право на контрола и проверка,  но секако останува и на самите станоиздавачи да ги прикажат приходите од туристичка такса“, вели Кифни Усеини, раководител на сектор за туризам

На  државно ниво се разгледуваат и нови решенија за справување со сивата економија во туризмот. Една од можностите е воведување туристичка полиција, која ќе  го засили надзорот на терен.

„Предвидено е туристичката инспекција да има поголеми овластувања во делот на инспекцискиот надзор, како што е случајот со инспекцијата при Министерството за култура и туризам. Во однос на туристичка полиција, имаме отворено повеќе прашања и направено анализи“, изјави  Зоран Љутков, министер за култура и туризам

Во Охрид се регистрирани вкупно 3700  приватни станоиздавачи. Во  последниот квартал општината од туристичка такса инкасирала  330 илјади денари.

Новинар Соња Рилковска