Охридското Езеро прогласено за најубаво место во Европа

Охридско Езеро е прогласено за најубаво место во Европа според изборот на туристичките новинари на Time Out, кои во својата најнова листа ги издвојуваат највпечатливите дестинации на континентот.

Во текстот, авторите го опишуваат езерото како „поевтина алтернатива“ на прочуеното Езеро Комо, познато по луксузните вили и големиот број туристи кои секоја година ја посетуваат италијанската област Ломбардија. Сепак, тие нагласуваат дека Европа крие бројни други езерски пејзажи кои нудат подеднакво импресивна убавина, но со значително помал метеж.

Охридско Езеро е опишано како неправедно потценета дестинација, сместена меѓу Албанија и Македонија, која нуди спектакуларни глетки и уникатно искуство за посетителите. Како едно од најстарите и најдлабоките езера во Европа, Охридското Езеро нуди мирна и финансиски подостапна алтернатива без компромис во природната убавина. „Кристално сина вода, планински пејзажи и крајбрежје исполнето со историски населби што изгледаат како да застанале во времето“, вака го опишуваат новинарите.

На македонската страна, градот Охрид е во центарот на вниманието, со калдрмисани улици, стотици средновековни цркви и карактеристични теракотни покриви кои се спуштаат кон езерото. Посетителите тука можат да уживаат во капење, истражување антички локалитети и романтични зајдисонца, сè тоа по значително пониски цени во споредба со италијанските туристички центри.

Од другата страна на езерото, во Албанија, пејзажите се поразновидни и подиви. Селото Лин се издвојува по археолошките остатоци од мозаици и живописните кампови покрај вода.

На листата на „Time Out“ се најдоа и други уникатни дестинации, меѓу кои познатата ботаничка градина во Лондон, како и архитектонско ремек-дело на Антонио Гауди во Барселона.

Со ова признание, Охридското Езеро уште еднаш ја потврдува својата позиција како една од највредните природни и културни дестинации во Европа.