Објавена првата епизода на подкастот „Гимназиски муабети“, гостинка директорката Светлана Велкоска

Младинската заедница од охридската Гимназија со поддршка од Europe House ја започна реализацијата на новиот подкаст „Гимназиски муабети“, проект создаден од млади и наменет за младите. Во првата епизода гостува директорката Светлана Велкоска, а преку отворен и искрен разговор се обработуваат теми значајни за секој гимназијалец.

Подкастот има за цел да отвори простор за дискусија за ученичките права, менталното здравје, образованието, младинското учество и секојдневните предизвици со кои се соочуваат младите, но и да ги истакне позитивните приказни кои инспирираат и мотивираат.

Под мотото „Од гимназијалци – за гимназијалци“, овој проект носи свежа енергија и автентичен младински глас во училиштето и заедницата.

Режијата и монтажата се дело на Иво Георгиески, камерата е на Михаил Трифуновски, водител е Матеј Баткоски, а ментор на проектот е проф. м-р Перчо Божиновски.