Спектакл достоен за ремек-дело: Огномет и прослава за „Саграда Фамилија“
Папата Лав XIV вчера го благослови новиот торањ на базиликата Саграда Фамилија во Барселона и ja предводеше света миса во едно од најпознатите архитектонски дела во светот. Со завршувањето на новиот торањ, Саграда Фамилија официјално стана највисоката црква во светот. Посетата на поглаварот на Католичката црква се совпаѓа со 100-годишнината од смртта на славниот архитект Антони Гауди, кој починал на 10 јуни 1926 година откако бил прегазен од трамвај на пат кон молитва.
Историскиот чин на благословување на Кулата на Исус Христос од страна на папата Лав XIV во Саграда Фамилија беше заокружен со спектакуларно светлосно шоу, огномет и настап на стотици дронови над небото на Барселона. Дроновите го прикажаа ликот на архитектот Антони Гауди и неговата позната мисла: „Прво љубовта, потоа техниката“, испраќајќи порака дека големите дела се создаваат пред сè со љубов, а потоа со вештина.
Кулата, изработена со помош на современи технологии и материјали како не’рѓосувачки челик, е крунисана со голем рефлектирачки крст висок колку петкатна зграда и тежок околу 100 тони, што според замислата на Антони Гауди треба да блеска преку ден и да го осветлува хоризонтот ноќе.
Базиликата претставува ремек-дело на бојата, геометријата и занаетчиството, а нејзиното завршување е резултат на работата на многу генерации архитекти и инженери. Тоа било особено тешко бидејќи голем дел од оригиналните планови и гипсени модели на Гауди биле уништени во текот на Шпанската граѓанска војна во 1936 година. Сепак, неговите ученици и соработници успеале да реконструираат голем дел од идеите преку фотографии, цртежи, книги и други документи, што им овозможило на идните генерации да продолжат со реализацијата на проектот.
По смртта на Гауди во 1926 година, кој успеал да ја види завршена само првата кула, изградбата честопати се соочувала со финансиски проблеми. Црквата се финансира исклучиво преку донации и приходи од посетители, а овој модел беше сериозно погоден за време на пандемијата на ковид-19 кога бројот на туристи нагло се намали. Сепак, последните години посетеноста повторно е во пораст, што овозможува продолжување на работите.
Иако денес „Саграда Фамилија“ изгледа речиси завршена, останува уште реализацијата на Фасадата на Славата, замислена од Гауди како главен свечен влез во базиликата. Токму овој дел предизвикува несогласувања со локалните жители, бидејќи проектот предвидува изградба на монументално скалиште за кое можеби ќе биде потребно уривање на неколку станбени објекти во непосредна близина на храмот.
И покрај сите пречки низ децениите – војни, недостиг на финансии и технички предизвици – „Саграда Фамилија“ останува едно од највпечатливите архитектонски дела во светот и симбол на визијата на Гауди, која конечно се доближува до својата целосна реализација.
