Дерматолог открива осум важни правила за употреба на кремите за заштита од сонце

Летните температури и сè почестото престојување на отворено ја прават заштитата од сонце поважна од кога било. Иако кремите со заштитен фактор станаа дел од секојдневната рутина на многумина, дерматолозите предупредуваат дека нивната ефикасност зависи од правилната употреба. Од количината што се нанесува, преку честотата на повторно мачкање, па сè до деловите од телото кои најчесто ги забораваме, малите грешки можат значително да ја намалат заштитата од штетното УВ-зрачење. Дерматологот д-р Ејми Перкинс за Stylist сподели осум совети кои можат да помогнат во поефикасна заштита од штетното ултравиолетово (УВ) зрачење.

Кремата за сончање не е единствена заштита

Според д-р Перкинс, една од најчестите заблуди е верувањето дека кремата за сончање овозможува подолго и безбедно изложување на сонце.

„Кремата треба да се смета како последна линија на одбрана, а не како прва. Сенката, заштитната облека, шеширите и очилата за сонце често обезбедуваат посигурна заштита бидејќи не се отстрануваат од кожата и не зависат од правилно нанесување“, објаснува таа.

Особено препорачува носење облека со UPF-заштита, која е наменета да блокира дел од УВ-зраците.

Нанесувајте доволна количина и обновувајте ја заштитата

Многумина нанесуваат крема наутро и сметаат дека таа ќе обезбедува заштита во текот на целиот ден. Но, реалноста е поинаква.

Во текот на денот ја допираме кожата, се потиме, бришеме лице или се пресоблекуваме, поради што дел од производот постепено се отстранува. Затоа, кремата треба повторно да се нанесува на секои два до четири часа, особено доколку подолго време престојувате на отворено.

Заштитете ја целата кожа, не само бемките

Некои луѓе сè уште нанесуваат крема само на местата каде што имаат бемки. Дерматолозите предупредуваат дека УВ-зрачењето ја оштетува целата кожа, а не само одредени точки.

Голем дел од карциномите на кожата се развиваат на претходно здрава кожа, а не задолжително од постоечки бемки.

Не ги заборавајте најизложените делови од телото

Ушите, вратот, скалпот, горниот дел од дланките и стапалата се меѓу деловите што најчесто остануваат незаштитени.

Токму на овие места дерматолозите често забележуваат сериозни оштетувања од сонце и појава на кожни заболувања. Затоа е важно кремата да се нанесува на секоја изложена површина од телото.

Запишете кога сте ја отвориле кремата

Еден од наједноставните, но корисни совети е на пакувањето да се запише датумот на отворање.

Повеќето производи имаат ознака во форма на отворена тегличка со број и буквата „М“ (3М, 6М, 12М), што означува колку месеци производот може безбедно да се користи по отворањето.

Доколку кремата е отворена подолго од препорачаниот период, можно е да не обезбедува соодветна заштита.

Следете го УВ-индексот, а не само временската прогноза

Облачното време не значи дека УВ-зрачењето е ниско.

Дури и кога сонцето не е видливо, ултравиолетовите зраци можат да бидат силни, особено во пролетните и летните месеци. Затоа, експертите препорачуваат редовно следење на УВ-индексот како подобар показател за потребата од заштита.

Најскапата крема не е секогаш најдобриот избор

Според д-р Перкинс, поважно е кремата да се користи редовно и во доволна количина отколку да биде скапа.

„Подобро е да користите подостапен производ кој ќе го нанесувате обилно и редовно, отколку скапа крема што ќе ја штедите“, вели таа.

Грижете се за сопствената кожа како што се грижите за кожата на децата

Родителите најчесто внимаваат нивните деца да бидат заштитени со шешири, соодветна облека, престој во сенка и креми со заштитен фактор.

Сепак, многумина ја занемаруваат сопствената заштита. Иако детската кожа е особено чувствителна на УВ-зрачење, ризикот од оштетувања и појава на рак на кожа постои во текот на целиот живот.

Затоа, експертите потсетуваат дека заштитата од сонце треба да биде секојдневна навика, без разлика на возраста или временските услови.