Венецуела погодена од два силни земјотреси од 7,2 и 7,5 степени во рок од една минута

Два силни земјотреси го потресоа Каракас во рок од една минута еден од друг, првиот со магнитуда од 7,2 степени, а вториот со магнитуда од 7,5.

Епицентарот на разорниот настан се наоѓал во непосредна близина на карипскиот брег, само 21 километар од градот Морон, а епицентарот бил пресметан на плитка и затоа поопасна длабочина од 10 километри, а потресите биле толку силни што ја потресле соседна Колумбија. Најсериозно погодени биле провинциите долж северниот брег на земјата, вклучувајќи ги Ла Гваира, Арагва, Карабобо и Фалкон, но за релативно олеснување на регионот, првично издаденото предупредување за потенцијално разорно цунами што им се заканува на Порторико и Девствените Острови било откажано од меѓународните системи за предупредување.

Спасувачките екипи ги пребаруваат урнатините, а вршителката на должноста претседателка на Венецуела, Делси Родригез, прогласи вонредна состојба и изрази сочувство, без да прецизира колку луѓе загинале. Шпанскиот весник „Ел Паис“ објави дека најмалку 32 лица загинале, повеќе од 700 се повредени, а се стравува дека бројките ќе се зголемат.

Официјалните владини власти сè уште не дале ниту груба проценка за вкупниот број на смртни случаи во земјата. Геолошкиот завод на Соединетите Американски Држави (USGS) објави пресметки дека, по вториот силен земјотрес, постои 44 отсто шанса бројот на жртви да надмине 10 000, а дури и 30 проценти шанса да загинат повеќе од 100 000 луѓе.

Земјотресите што ја погодија Венецуела урнаа голем број згради во главниот град Каракас.

–САД ќе испратат тимови за пребарување и спасување и медицински и хуманитарна помош во Венецуела. Стејт департментот има тим за помош при катастрофи кој работи со партнери во привремената венецуелска влада, изјави Џереми Левин, заменик-државен секретар за странска помош.

Инаку, Венецуела се наоѓа во подрачје каде што се среќаваат Карипската и Јужноамериканската тектонска плоча. Овие плочи постојано се движат една покрај друга, а кога ќе се заглават и потоа ненадејно ќе се ослободат, доаѓа до силен земјотрес.

Фактот што во близина на Каракас во многу краток временски период се случиле два силни земјотреса со магнитуда 7,2 и 7,5 покажува дека дошло до повеќекратно пукање на истиот расед. Тоа значи дека енергијата не се ослободила одеднаш, туку во два последователни силни удари.

Сеизмолозите предупредуваат дека опасноста сè уште не е завршена. По вакви силни земјотреси вообичаено следуваат дополнителни потреси, а некои од нив можат повторно силно да го затресат тлото. Според стручњаците, Карипската тектонска плоча постојано се движи покрај Јужноамериканската. Со текот на времето меѓу нив се создава голем притисок, а кога тој ненадејно ќе се ослободи, настануваат силни земјотреси.

Фото: EURONEWS