Американскиот актер Кевин Костнер го претстави пред американскиот Конгрес својот план за чистење на нафтената дамка во Мексиканскиот Залив. Познатиот актер пред конгресниот Одбор задолжен за истражување на причините на најголемата еколошка катастрофа во историјата на САД вчера ја претстави технологијата на својата компанија, која се занимава со производство на машини за чистење на нафтени дамки, преку процес на одвојување на нафтата од водата, пред таа да стигне до брегот.
Костнер на патентот за таа машина и за нејзиното производство, на кое работел заедно со својот брат, научник, потрошил повеќе од 20 милиони долари.
Тој појасни дека неговата фирма „Оушн терапи солушн“ со своите машини може да ја исчисти дамката ефикасно и брзо, без многу вложувања.
Костнер ја искористи оваа прилика да ги нападне нафтените компании, кои не вложуваат доволно напори за санирање на еколошките катастрофи, предизвикани со истекување на нафтата.
– Тешко е да се разбере дека успеавме да го испратиме човекот на Месечината и дека развиваме нуклеарна енергија, а се уште не сме во состојба да ги исчистиме нафтените дамки кои ги правиме, додаде тој.
{loadposition content9}
