Мирисот на летото во секоја чаша

Зрелите кајсии се меѓу најомилените летни плодови, а покрај тоа што се идеални за џемови и слатко, од нив може да се подготви и вкусен домашен сок. За разлика од индустриските пијалаци, домашниот сок не содржи вештачки бои и ароми, а количината на шеќер може да ја прилагодите според сопствениот вкус.

Ако се подготви и складира правилно, сокот го задржува препознатливиот мирис и вкус на кајсиите и може да трае во текот на целата зима.

Потребни состојки:

• 5 кг зрели кајсии
• 3 литри вода
• 700 г до 1 кг шеќер (по вкус)
• 2 кесички лимонтус (20 г) или сок од 2 лимони

Начин на подготовка:

Кајсиите добро измијте ги, преполовете ги и извадете ги семките.

Ставете ги во големо тенџере, додајте ја водата и варете ги околу 20 до 30 минути, додека целосно не омекнат.

Со рачен блендер или класичен блендер испасирајте ги во мазна смеса. Доколку сакате побистар сок, процедете ја смесата низ густо сито.

Додајте го шеќерот и лимонтусот, па варете уште 10 до 15 минути, повремено мешајќи, додека шеќерот целосно не се растопи.

По потреба додајте уште малку вода доколку сакате поредок сок и прилагодете ја слаткоста по вкус.

Врелиот сок сипете го во претходно стерилизирани стаклени шишиња или тегли, веднаш затворете ги и превртете ги наопаку околу пет минути.

Потоа вратете ги во нормална положба, покријте ги со ќебе и оставете ги постепено да се ладат 12 до 24 часа.

Совети за совршен домашен сок:

• Користете целосно зрели, но здрави кајсии за најбогат вкус и арома.
• Количината на шеќер прилагодете ја според природната слаткост на овошјето.
• Чувајте го сокот на темно и ладно место.
• По отворањето, шишето чувајте го во фрижидер и консумирајте го во рок од неколку дена.

Вака подготвениот домашен сок од кајсии е одличен избор за освежување во текот на целата година. Може да се пие неразреден или разреден со ладна вода, а за уште подобар вкус послужете го со неколку коцки мраз.