УИНТ „Св. Апостол Павле“ формира Канцеларија за трансфер на технологии
Универзитетот за информатички науки и технологии „Св. Апостол Павле“ од Охрид започна со процесот на воспоставување Канцеларија за трансфер на технологии (Technology Transfer Office – TTO), како една од клучните активности во рамки на меѓународниот проект COPILOT, поддржан од Европскиот институт за иновации и технологии (EIT) и Европската Унија (ЕУ).
Во процесот на креирање и развој на ТТО, Универзитетот го користи искуството и добрите практики на своите проектни партнери – Данскиот технички универзитет (Technical University of Denmark – DTU), Националниот и Каподистриски универзитет во Атина (National and Kapodistrian University of Athens) и Кипарскиот институт (The Cyprus Institute), институции кои имаат развиени системи за трансфер на технологии, управување со интелектуална сопственост и комерцијализација на научноистражувачки резултати.
-Целта на Канцеларијата за трансфер на технологии е да создаде институционален механизам преку кој научните истражувања, иновациите и технолошките решенија развиени на Универзитетот ќе се поврзат со потребите на индустријата и пазарот. ТТО ќе обезбедува поддршка за заштита на интелектуалната сопственост, развој на патенти, лиценцирање на технологии, креирање стартап компании и воспоставување партнерства помеѓу академската заедница и стопанството. Формирањето на ТТО претставува значаен исчекор во развојот на Универзитетот како современа, иновативна и претприемачки ориентирана високообразовна институција. Канцеларијата ќе придонесе за поголема комерцијализација на научните резултати, зголемена вклученост во европски иновациски екосистеми и зајакнување на соработката со домашни и меѓународни компании, велат од УИНТ „Св. Апостол Павле“.
Од таму додаваат дека за студентите, ТТО ќе отвори нови можности за развој на претприемачки вештини, учество во иновативни проекти, менторство од експерти и трансформирање на нивните идеи во реални производи, услуги и стартап компании. На тој начин ќе се поттикне создавањето на нова генерација млади иноватори и технолошки претприемачи. а за индустријата, Канцеларијата за трансфер на технологии ќе претставува мост на поврзување со универзитетската експертиза и истражувачките капацитети, овозможувајќи полесен пристап до нови технологии, заеднички истражувачко-развојни проекти, технолошки консалтинг и развој на иновативни решенија кои ќе ја зголемат конкурентноста на компаниите.
Со воспоставувањето на ТТО, Универзитетот за информатички науки и технологии „Св. Апостол Павле“ го зајакнува својот придонес во националниот и регионалниот иновациски екосистем и ја потврдува својата посветеност кон поврзување на науката, образованието и индустријата во насока на одржлив економски и технолошки развој.
