Денес се празнуваат Светите седум маченици Макавеи

Православните христијани денеска, 14 август, го празнуваат празникот Светите седум маченици Макавеи, со кој започнува Богородичниот пост.

Според христијанското предание, седумте браќа Макавеи, нивната мајка Соломонија и свештеникот Елеазар пострадале околу 180 години пред Христос, бранејќи ја својата вера во едниот Бог. Сирискиот цар Антиох Епифан наредил Евреите да се откажат од својата вера и, меѓу другото, да јадат свинско месо, но Макавеите одбиле да ја прекршат верата на своите предци. Браќата биле мачени и погубени еден по еден пред очите на нивната мајка. Според преданието, по смртта на нејзиниот последен син, и Соломонија се фрлила во огнот, предавајќи му ја душата на Бога.

Макавеи во народната традиција

Во македонската народна традиција празникот Макавеи има посебно значење и се смета за „тежок празник“, кога не се работи. Во минатото, според временските прилики во макавeјските денови, народот прогнозирал какво ќе биде времето во следните месеци или во текот на целата година.

Во некои краишта се сметало дека Макавеи траат шест, а во други дванаесет дена. Секој ден се поврзувал со одреден месец, па убавото време се толкувало како најава за убав месец, а променливото време како знак за променливи временски услови.

Во народните верувања се сметало и дека со Макавеи времето „се завртува“ кон зимата, а штрковите и ластовичките започнуваат да се подготвуваат за преселба во потоплите краишта.

Ваквите верувања за Макавеи се забележани и во етнографските записи на Димитар Матов, Кузман Шапкарев и Марко Цепенков, како и во зборникот на браќата Миладиновци.

Празникот, освен со почетокот на Богородичниот пост, во народната традиција останал поврзан и со почитувањето на деновите, предвидувањето на времето и подготовките за претстојната зима.