Црвен крст Охрид го започнува новиот циклус на програмата „Млади лидери создаваат иднина“

Црвен крст Охрид започнува нов циклус на програмата за развој на младинско лидерство „Млади лидери создаваат иднина“, наменета за ученици од деветто одделение до трета година средно образование.

Учеството во програмата е бесплатно, а заинтересираните ученици можат да се пријават најдоцна до 13 септември 2026 година.

Програмата има за цел да им овозможи на младите да ги унапредат своите вештини, да го развијат личниот потенцијал и да стекнат знаења и искуства кои ќе им помогнат во остварувањето на нивните цели, но и во придонесот кон развојот на заедницата.

Во рамки на програмата, учесниците ќе имаат можност да следат 13 работилници посветени на развој на животни, лидерски и вештини за вработливост, како и да учествуваат на панел за кариера.

Новиот циклус започнува на 15 септември 2026 година и ќе се реализира до крајот на првото полугодие од учебната година. Работилниците ќе се одржуваат секој вторник со почеток во 19:00 часот, во просториите на Црвен крст Охрид, на улица „Димитар Влахов“ бр. 52.

Од Црвен крст Охрид ги повикуваат сите заинтересирани ученици да се пријават и да станат дел од програмата „Млади лидери создаваат иднина“.

Пријавувањето се врши преку онлајн формулар: Млади лидери создаваат иднина