Во Скопје започна Европското првенство во танц

Скопје овие денови е во знакот на танцот, откако од 21 до 29 септември се одржува IDO European Dance Championship 2026, голем меѓународен танцов настан во кој учествуваат повеќе од 2.900 танчери од европски земји во Т-Арена при СЦ „Борис Трајковски“.

Во рамки на деветдневното првенство се одржуваат натпревари во повеќе дисциплини, меѓу кои балет, џез танц, модерен и современ танц и Performing Arts Improvisation, во различни возрасни категории и натпреварувачки формати. Посебно внимание привлекува фактот што Скопје е домаќин на европските првенства на IDO, со што македонската публика има можност во живо да проследи настапи на голем број танчери и танцови формации од Европа.

Во рамки на програмата е предвидена и Парада на нациите, која ќе се одржи на 25 септември во СЦ „Борис Трајковски“, како дел од свеченостите поврзани со првенството.

Организаторите најавуваат професионални услови за натпреварување, со две танцови подиуми за соло, дуо и мали групи, како и посебен подиум за формации и продукциски настапи. Финалистите ќе бидат наградени со медали, додека освоените први три места ќе добијат и трофеи.

Европското првенство претставува и значаен меѓународен настан за Скопје, кој во текот на овие денови е домаќин на танчери, тренери, претставници на федерации, семејства и посетители од повеќе европски земји.