Пристигнаа првите 30.000 вакцини против сезонски грип, вакцинацијата од 16 до 25 октомври

Првите 30.000 вакцини против сезонски грип се пристигнати во земјава, а вакцинацијата се очекува да започне во периодот од 16 до 25 октомври, откако ќе се организира логистиката со центрите за јавно здравје, информираше министерот за здравство Сашо Клековски.

Според најавите, првите дози ќе бидат наменети за најризичните категории граѓани. За вакцинација ќе биде потребно пријавување преку модулот за вакцинација во системот „Мој Термин“.

Втората пратка од 26.000 вакцини се очекува да пристигне до 15 ноември. Со тоа, во моментов се планирани вкупно 56.000 дози, а Министерството за здравство работи на обезбедување дополнителни вакцини, со цел бројката да достигне 80.000.

Министерот Клековски најави дека прв ќе се вакцинира, со цел да ги поттикне граѓаните да се пријават за имунизација против сезонски грип.