Ивана Пешликовска, Марко Трајкоски и Филип Малезанов учесници на 4. Конференција за младинско претприемништво „Да градиш иднина дома“

Во Младинскиот центар Охрид денес се одржа 4. Конференција за младинско претприемништво „Да градиш иднина дома“, на која младите имаа можност да слушнат лични искуства и совети од охридски претприемачи за предизвиците и можностите за започнување сопствен бизнис.

Во рамки на панел-дискусијата „А што ако успееш?“, Ивана Пешликовска од IP Interior Design, Марко Трајкоски од Пицерија Прова и Филип Малезанов од Малезан Филигран ги споделија своите искуства од започнувањето и развојот на сопствените бизниси во Охрид. Тие зборуваа за првичните предизвици, пречките со кои се соочиле и лекциите што ги научиле на патот кон градење успешни бизнис-приказни.

По панел-дискусијата, во соработка со Центарот за вработување – Охрид, беше организирана и информативна сесија посветена на можностите за вработување и достапната поддршка за младите кои сакаат да направат нов професионален чекор.