Семки кои се вистинско богатство за срцето и крвните садови

Здравата исхрана е еден од најважните фактори за зачувување на здравјето на срцето и крвните садови. Дури и малите промени во секојдневното мени можат да донесат долгорочни придобивки за организмот. Покрај чиа и лененото семе, како и јаткастите плодови, постои уште една намирница која често ја занемаруваме, а е вистинска ризница на хранливи материи – семките од тиква.

Тие се одличен извор на магнезиум, минерал кој е неопходен за правилно функционирање на мускулите, нервниот систем и срцето.

Магнезиумот учествува во одржувањето на нормалниот срцев ритам, како и во регулирањето на нивото на калциум и калиум, минерали кои исто така имаат важна улога во работата на срцевиот мускул. Освен тоа, придонесува за опуштање на мускулите во ѕидовите на крвните садови, поради што е важен и за регулирање на крвниот притисок.

Кардиологот и лекар по функционална медицина, д-р Санџај Боџраџ, нагласува дека доволниот внес на магнезиум е особено важен за здравјето на кардиоваскуларниот систем.

Зошто семките од тиква се толку корисни?

Освен магнезиум, семките од тиква содржат и растителни протеини, незаситени масни киселини, цинк и други важни хранливи материи.

Нивна голема предност е и тоа што лесно можат да се вклучат во секојдневната исхрана. Може да ги додадете во салати, крем-супи, овесна каша, јогурт или јадења со интегрални житарки.

Одлично се комбинираат и со печен зеленчук, како брокула, тиквички и моркови. Може да се консумираат сурови или кратко да се потпечат во сува тава, за да добијат поинтензивен вкус.

Сепак, нутриционистите советуваат да се избираат несолени семки, бидејќи прекумерниот внес на сол може негативно да влијае врз крвниот притисок.

Како да ги вклучите во здрав и балансиран оброк?

Д-р Боџраџ како пример за урамнотежена вечера го посочува лососот со печен зеленчук, леќа или киноа, авокадо и семки од тиква, зачинети со малку маслиново масло.

Ваквиот оброк обезбедува комбинација од протеини, растителни влакна, здрави масти и минерали кои се важни за правилно функционирање на организмот и зачувување на здравјето на срцето.

Иако ниту една намирница сама по себе не може да спречи појава на кардиоваскуларни заболувања, редовното консумирање семки од тиква може да биде корисен дел од разновидната и балансирана исхрана.

Затоа, следниот пат кога ќе подготвувате салата, појадок или лесна вечера, не заборавајте да додадете и една рака семки од тиква.