Македонската филхармонија вечер ќе одржи симфониски концерт под водство на познатиот гостин диригент од Велика Британија Тимоти Редмонд.
На програмата се три премиерни изведби – Концертот за пијано и оркестар бр. 4 г-мол од Сергеј Рахмањинов во изведба на истакнатиот шведски пијанист Роланд Понтинен, свитата од операта „Итра мала лисица“ од Леош Јаначек и композицијата „Руски погреб“ за лимени дувачи и удиралки од Бенџамин Бритн.
На програмата ќе биде изведено уште едно дело на Рахмањинов, „Остров на мртвите“ оп. 29. Напишано е како инспирација од истоимената слика на швајцарскиот уметник Арнолд Боклин, која оставила силен впечаток кај композиторот.
Шведскиот пијанист Роланд Понтинен кој ќе настапи вечер е познат на меѓународната сцена, со кариера и како солист и како камерен музичар, изведувајќи различни дела од класичниот репертоар.
Настапувал со најдобрите оркестри во Европа, САД, Кореа, Јужна Америка, Австралија и Нов Зеланд и соработувал со диригенти како Мјунг-Вун Чунг, Нееме Јарви, Пааво Јарви, Еса-Пека Салонен, Јука-Пека Сарасте, Евгениј Светланов, Давид Цинман и многу други.
Особено се значајни неговите настапи со филхармониите во Париз и Лондон, Филхармонијата на Лос Анџелес во Холивуд, Шкотскиот камерен оркестар во Глазгов и Единбург како и настапите на БиБиСи промс во Лондон со концертите за пијано и оркестар на Григ и Лигети.
{loadposition content9}
