Од Уметничката галерија во Ротердам вчера биле украдени седум слики на Пабло Пикасо, Анри Матис, Клод Моне, Пол Гоген, Лусијен Фројд и Мејер де Хан. Ова е една од најголемите уметнички кражби во последните неколку години во Холандија, а вредноста на делата се проценува на повеќе стотици милиони долари.
Холандската полиција соопштила дека сликите биле украдени во вторникот околу 3 часот по полноќ. Тие биле изложени како дел од прославата на 20-годишнината на Фондацијата Тритон.
“Во текот на ноќта се случила кражба и земени се неколку слики кои имаат прилична вредност“, рекла Патрисија Веселс, претставничка за медиуми на галеријата.
Украдени биле две дела на Клод Моне (Charing Cross Bridge, London и Waterloo Bridge, London 1901 година) и по една слика на Пикасо (Harlequin Head 1971 година), Матис (Reading Girl in White and Yellow 1919 година), Гоген (Girl in Front of Open Window 1898 година), де Хан (Self-Portrait 1890 година) и на Фројд
(Woman with Eyes Closed 2002 година).
Фондацијата Тритон е збирка на авангардна уметност и на изложбата во Уметничката галерија биле претставени дела на преку 150 уметници, вклучувајќи го Пол Сезан, Салвадор Дали, Рој Линхенштајн и на Енди Ворхол.
Ова е прв пат целата колекција да биде изложена на едно место. Уметничката галерија во Ротердам е само изложбен простор и нема своја постојана колекција.
{loadposition content9}
