Песнички за сливата, јаболкото, калинката и другите овошки кои виреат во земјава се дел од најновото издание „Македонски овошни приказни во стих“, наменети за најмладите читатели. Весна Пирузева Петровска е автор на аудиовизуелниот проект, песни за деца и боенка пропратени со аудиозапис на стиховите. Идејата на авторката првично била да напише книга со детски песнички за секое овошје, но подоцна добила поинаков тек.
„ Пишувајќи ги песничките се внесов во детскиот свет, па идејата сама по себе се наметна и произлезе друга целина. Помислив зошто стиховите да не се пропратени со боенка, а додека детето бои убаво е да ги слуша песничките на ЦД , пропратени со убава муизка во позадина“, кажува Пирузева Петровска. 
Авторката на „Македонски овошни приказни во стих“ со став дека има недостаток од литература за деца. Нејзината заложба е што повеќе да се пишува за децата и да им се всадат моралните вредности уште од детството.
„ Во областа на детската литература има голем дефицит на нови изданија. Сите трчаат по материјалните вредности, а децата се се почесто занемарени. Градењето на една личност и всадувањето на тие вредности започнуваат од најмала возраст.“
Весна Пирузева Петровска пишува поезија за деца и возрасни, а подготвува и литература од областа на здравата храна и нутриционизмот.
{loadposition content9}
