Се уште, предрасудите кон овие лица се големи, а неретко се случува да бидат одбиени и за здравствени услуги. Неинформираност и непознавање, за жал постои и кај здравствените работници.
Луѓето инфицирани од ХИВ се плашат да проговорат, од многу причини. Ние се уште сме општество со предрасуди, па и оттука потекнува стравот од осуда и отфрлање од страна на околината. Стравуваат од губење на работното место.
Подигнувањето на нивото на информираност и јавна свест за лицата со ХИВ како и елиминирање на предрасудите и дискриминацијата се главните цели на активностите кои под мотото „Да ги симнеме предрасудите“ ги спроведува здружението „Заедно посилни“ во соработка со голем број истакнати личности, институции и организации од земјава.
Активностите на „Заедно посилни“ кои се дел од пошироката национална кампања во која се вклучени и Канцеларијата на Светската здравствена организација и Министерството за здравство опфаќаат повеќе едукативни и информативни содржини, работилници и настани. Предвидени се дебата со проекција на видео насловена како „Позитивни разговори“ што ќе се одржи во недела на 24 ноември во МКЦ во 20 часот како и добротворниот концерт на Македонската филхармонија и операта предвиден за Светскиот ден против СИДА на 1 декември
Од 1987 до 2012 година официјална бројка на инфицирани од ХИВ е 169, од кои 69 починале, па таа бројка изнесува околу 100. Главно прашање за лицата инфицирани со ХИВ е сеопфатна здравствена грижа и континуирана достапност на терапијата, која е бесплатна. Буџетот наменет за терапијата за следната година е зголемен, па се очекува во 2014 да се надминат сите пречки.
Она што е важно да се знае дека овие лица доколку редовно примаат антиретровирусна терапија можат да водат сосема нормален живот и да основаат семејства. Жена која е инфицирана со ХИВ и зема континуирано терапија може да роди бебе кое не е инфицирано. Најголем ризик за новороденчето е пораѓајот, односно контактот со крвта на мајката, но и ова е решливо преку пораѓање со царски рез. Ризикот да се пренесе вирусот додека бебето е во утробата или додека мајката го дои, е многу мал. Повторно доколку лицето е под континуирана антиретровирусна терапија.
Доколку правите тест, добро е да знаете дека за да бидете најсигурни во резултатите, најдобро е да се тестирате три месеци од моментот на „сомнителниот“ сексуален однос или случај. Антителата кои организмот ги создава, доколку е инфициран од овој вирус се развиваат побавно и овој процес уште е познат и како „период на прозорец“.Во тој период тестот може да не биде валиден, бидејќи не можат да се детектираат антителата или делови од вирусот.
Но како и да е, треба убаво да се погледнеме меѓусебе и да се прифатиме, затоа што можеби некој што седи во иста канцеларија со вас или блиску до вас, е носител на вирусот.
{loadposition content9}
