Нови правила на српскиот авиопревозник

На летовите на Ер Србија во иднина ќе важат нови правила за превоз на багаж, усогласени со стандардите на европските авиопревозници, соопштено е од оваа компанија.

Имено, наместо досегашниот концепт по тежина, на летовите на Ер Србија во иднина ќе се применува концептот по парче предаден багаж.

Во соопштението се наведува дека патниците од 1-ви мај 2014 година ќе можат во економска каласа да превезат еден багаж со максимална тежина од 23 килограми, а во бизнис класата два багажа со тежина од 32 кг. поодделно.

Генералниот директор на Ер Србија Дане Кондиќ рекол дека оваа промена е важен чекор кон целта за прилагодување на условите за транспорт со европските компании.

Од Ер Србија наведуваат дека секој предаден багаж кој ја преминува дозволената тежина, бројот и димензијата, одредени со новите услови, ќе биде посебно наплатуван.

Подетални информации се достапни на интернет страницата на Ер Србија и на сите продажни места од компанијата.